BAGUIO CITY – Dumanonen iti nasurok P12-M ti gatad dagiti nadadael iti sektor ti agrikulturta gapu iti panagdalapos ti bagyo a Quiel sadiay probinsia ti Apayao kas maibasar iti inisyal a report ti Department of Agriculture (DA) – Cordillera.
Nakasaad iti report a nasurok iti P4-M ti danyos iti industriya ti panagmais ken nasurok met iti P7-M iti high value crops.
Naapektaran iti napigsa a panagtudtudo ti 15 a mannalon ti mais ken nasurok 1,200 a mannalon iti high value crops.
Nadadael metlaeng dagiti pagmulaan ti high value crops nga addaan kalawa a 126 nga ektarya bayat a partially damaged ti 305 nga ektarya a namulaan ti mais.
Agtultuloy ita ti panagwanawan ti ahensia iti epekto ti nasao a bagyo sadiay Apayao ken ti panagalada ti kanayonan a datus iti dadduma pay nga industriya iti sektor ti agrikultura.
Kabayatanna, naituding a mangisayangkat ti Cordillera Regional DRRM Council ken ti DA-Cordillera iti Rapid Disaster Assesment and Needs Analysis seknan iti nagbalin nga epekto ti bagyo a Quiel iti rehiyon Cordillera, partikular sadiay Apayao tapnu maipaay ti kaskenan a tulong kadagiti naapektaran a mannalon.
