Dumanon iti minilmilyon ti gatad ti danyos nga intunda iti napasamak nga uram idiay Puguis La Trinidad, Benguet itay laeng parbangon.
Maibasar iti inisyal nga imbestigasyon, tallo a pasdek ti totally burned pakairamanan iti maysa nga auto repair shop, maysa a sari-sari store, ken maysa a pagtaengan.
Iti patta-patta dagiti otoridad, dumanon iti Php11, 473,000 ti pakabuklan a danyos.
Kabayatanna,nabigbig ti pimmusay a driver a ni Edgar Ocan Bon, agtawen iti limapulo ket dua(52) a tubo iti Samar.
Nadangran met iti insidente ti kadwa daytoy a ni John Lester Bon Canuto, agtawen iti dua pulo ket dua(22) a tubo met idiay Mercedes Camarines Norte.
Maipalagip a napasamak ti uram kasaruno ti panakanaidungpar ti imanmaneho ni Edgar a 24-wheeler gas tanker iti maysa a warehouse idiay Puguis, La Trinidad, Benguet 12:53 itay parbangon.
Sigun pay iti inisyal nga imbestigasyon, nakatapwak manipod iti lugan ti kadwa ti driver rason a nakalasat daytoy ngem saanen a naarayat pay dagiti rimmesponde ti driver gapu ta naipit daytoy.
Agtultuloy latta paylaeng met ti ipatpatungpal nga imbestigasyon dagiti otoridad.//Bombo Newsteam
