Dumanon iti mapatta-patta a P280K ti danyos nga intunda ti uram iti paset ti Skyland Global Consortium Hotel idiay Purok 18, Irisan Baguio City itay laeng kanikadua.
Sigun iti imbestigasyon, nadlaw dagiti sumagmamano nga indibidual ti uram bayat a manarimaan ti misa iti lugar asideg iti nakapasamakan daytoy.
Kasaruno dayta, binettak dagiti nakakita iti insidente ti glassdoor daytoy ken inaramatda ti fire extinguisher rason a saanen a nagramaram pay ti uram.
Naduktalan met a nangrugi ti uram iti reception desk iti umuna a kadsaaran ti nasao a pasdek.
Kabayatanna, indeklara ti Bureau of Fire Protection-Irisan ti fire out 10:03 ti agsapa iti isu metlaeng nga aldaw bayat a manarimaan paylaeng ti imbestigasyon iti rason iti panakapasamak daytoy.
Awan met ti nadangran gapu iti nasao nga insidente.//Bombo Jez Lapizar
