Dumanonen iti agarup P32.8 Milyon ti danyos a nailista kadagiti pagadalan iti Rehiyon Cordillera manipud Agosto 2 agingga Setyembre 2 iti agdama a tawen gapu iti napasaran a saan a nasayaat a paniempo.
Sigun iti report ti Department of Education-Cordillera, nailista ti kangatuan a damages iti Probinsya ti Abra a dumanon iti agarup P22.9 Milyon. Agarup 453 a klasrum ti partially damaged, 83 ti addaan iti major damage ken innem ti nailista a totally damaged classrooms.
Sarunoen met daytoy ti siudad ti Baguio iti agarup P4.6 Milyon a danyos no sadino 179 a pagadalan ti addaan iti minor damage ken lima ti addaan iti major damage.
Sumaruno met ditoy ti Probinsya ti Benguet no sadino nailista ti agarup P3.9 Milyon a danyos. Agarup 195 ngamin a klasrum ti addaan iti minor damage, 10 ti addaan iti major damage, ken maysa ti entiramente a nadadael.
Agarup P2.1 Milyon met ti nailista a danyos iti Probinsya ti Mountain Province no sadino 81 a klasrum ti addaan ti minor damage ken 52 ti addaan iti major damage.
Kabayatanna, agarup P1.6 ti danyos ti nadadael a klasrum idiay Apayao no sadino 22 classrooms ti partially damaged ken dua a klasrum ti addaan iti major damage.
Iti met probinsya ti Kalinga, walo a klasrum ti addaan iti bassit a dadael ken lima ti nailista nga addaan iti major damage. Dumanon met iti P325,000 ti nailista kas pakabuklan a danyos kadagiti pagadalan iti nasao a probinsya.
Ti met Ifugao ti nakailista iti kababaan a danyos a dumanon iti P160,000 no sadino dua a klasrum ti addaan minor damage ken major damages bayat nga adda met ti maysa a totally damaged classroom.
Awan met ti nailista nga anyaman a nadadael kadagiti pagadalan iti siudad ti Tabuk. //via Bombo Noveh Organo
