BAGUIO CITY – Naiyawiden sadiay Tabuk City, Kalinga ti bangkay ti Pinay worker a pimmusay sadiay Saudi Arabia kalpasan a naatake gapu iti sakitna iti puso.
Nabigbig daytoy a ni Emelda Tibursio, tubo ti probinsia ti Kalinga ken nagtrabaho kas beautician sadiay Riyadh, Saudi Arabia.
Naamuan a pimmusay daytoy idi pay Hulyo ti agdama a tawen.
Pormal met a sinabat ti anak ni Tibursio ti dapo daytoy iti maysa a memorial chapel ken crematorium sadiay Araneta, Quezon City.
Sigun kenni Kalinga Public Employment and Service Officer Francis Biag, narigatan ti pamilya ni Tibursio a nangiyawid iti bangkay ti nasao nga OFW gapu kadagiti nagduduma a lockdown nga intunda ti COVID-19 pandemic.
Nupay kasta, kinunana nga inkagumaan ti lokal a gobierno ti siudad ti Tabuk a nakikoordinar iti Overseas Workers Welfare Administration (OWWA) para iti panakaiproseso dagiti kasapulan a dokumento tapno maiyawid ti bangkay ni Tibursio.
Kabayatana, naipanamnama met a maipaayan iti tulong pinansial ti imbati a pamilya ni Tibursio babaen iti OWWA ken ti lokal a gobierno ti Tabuk City, Kalinga.
