BAGUIO CITY – Impaulog ti lokal a gobyerno ti La Trinidad, Benguet ti advisory daytoy tapnu maalay-ayan ti parikut ti riding public iti pagluganan dagitoy kasaruno ti panakaipawil ti panagbiahe dagiti parapubliko a lugan gapu iti naideklara nga Enhanced Community Quarantine iti entero a Luzon.
Karaman ditoy ti panangipaay ti LGU iti emergency vehicle a mangilugan kadagiti umili sadiay nga addaan ti nakaro a medical conditions, pakairamanan dagiti maipaspasidong iti dialysis.
Agabang ti LGU iti limitado a parapubliko a lugan para kadagiti 16 a barangay ti La Trinidad ken maaramat dagitoy iti limitado nga oras manipud alas-otso agingga alas-dies ti agsapa ken alas-tres agingga alas-singko ti malem tapnu maasistaran dagiti residente a gumatang iti pagkasapulan dagitoy.
Maaramat metlaeng ti lugan dagiti barangay ngem nasken a nainget a masurot dagiti precautionary health measures.
Naibilin ti panangisumitir dagiti barangay officials ti La Trinidad iti listaan dagiti nakukurapay a residente sadiay nga agkasapulan ti relief goods.
Guyguyuguyenda met dagiti addaan mabalin iti biag iti panangited dagitoy iti tulong kadagiti agkasapulan ita a panawen.
Natudukan a hotlines sadiay La Trinidad, Benguet ti 0939-990-0789; 620-5907; 0998-985-7568; 0910-303-8200 ken 0910-310-1182.
