Saan a bumaba iti walo (8) nga indibidwal ti pimmusay gapu iti magnitude of 7.4 a ginggined a dimmalapos idiay Davao Oriental idi kalman iti agsapa.
Pakairamanan daytoy iti tallo a minero a manarimaan nga agminminas iti kabanbantayan a paset iti Manay, Davao Oriental idi napasamak ti ginggined, maysa a sibilyan idiay Mati City a natupakan iti narba a pader, dua manipod iti kapada a lugar a naatake iti puso, maysa manipod Davao City a natupakan metlaeng iti natnag a debri, ken maysa pay a naatake metlaeng iti puso idiay Montevista, Davao de Oro.
Mainaig iti dayta, posible met nga agbayag agingga inton Lunes, October 13 ti panakasuspindir iti klase idiay Davao City tapno maipaayan iti gundaway dagiti building inspectors a mangipatungpal iti structural assessments kadagiti pasilidad ken imprastraktura partikular dagiti pagadalan tapno maipanamnama ti kinatalged dagiti estudyante apaman nga agsubli dagitoy iti klase.
Kabayatanna, inlawlawag met iti Philippine Institute of Volcanology and Seismology (Phivolcs) nga awan ti pakainaigan iti magnitude 7.4 a ginggined idiay Davao Oriental iti magnitude 6.9 a dimmalapos met idiay Bogo City, Cebu idi September 30.
Sigun kenni Phivolcs Director Teresito Bacolcol, dagiti dua a ginggined ket intunda iti nagduma nga earthquake generators nu sadino, ti napasamak idiay Davao Oriental ket gapu iti Philippine Trench bayat a ti napasamak idiay Cebu ket gapu met iti Bogo Bay Fault.
Inlawlawag ti opisyal nga awan iti pattern kadagiti napasamak a ginggined nu sadino, normal laeng a mapasamak dagiti tectonic activities iti Pilipinas gapu iti lokasyon daytoy iti Pacific Ring of Fire.
