BAGUIO CITY – Agsagsaganan dagiti delegado ti rehion Cordillera para ti Palarong Pambansa a maangay sadiay Antique inton Abril 23-29.
Sigun kenni Georaloy Palao-ay, information Officer ti DepEd-Codillera, dumanon iti 700 ti delegado ti Cordillera pakairamanan dagiti official, trainors ken Coaches.
Kinunana a kaaduan kadagiti atleta a makipaset iti Palarong Pambansa ket manipod iti siudad ti Baguio partikular dagiti nagkampeon iti naangay a CARAA idi bulan ti Pebrero.
Naamuan met nga inton April 14 ket agturongen dagitoy sadiay Antique ken sadiayda manen nga agsanay agingga iti pormal a panagrugi ti ay-ayam.
Impannakelna met a kompleto itan ti delegado ti rehion pakairamanam dagiti makibalubal iti wushu, wrestling ken iti billiards.
Mangnamnama met dagitoy nga agsubli wenno maragpat ti rehion Cordillera ti maikalima a pwesto iti over-all standing kalpasan a nagun-od laeng dagitoy ti maika-siam a pwesto idi napalabas a tawen.
Naamuan a dumanon iti sangapulo a milyon a pesos ti nailatang a pondo para iti uniporme, transportasyon ken dadduma pay a pagkasapulan dagiti atleta kabayatan ti Palarong Pambansa.
