Agtultuloy a mangnamnama ti delegasyon iti Probinsya iti Benguet a makaala iti napintas a resulta iti performace dagitoy iti manarimaan a 2024 Batang Pinoy idiay Puerto Princesa, Palawan.
Iti panakiuman iti Bombo Radyo kenni Marvin Sicomen, Head Coach iti Kickboxing-Benguet, mangnamnama daytoy a makwalipikar iti finals amin dagiti atleta partikular iti kickboxing.
Sigun kenni Sicomen, saan nga amin nga atleta a naituding a mangibagi iti Probinsya iti Benguet ita a tawen ket nakasurot gapu ta manipod iti pakabuklan a bilang dagitoy a nasurok 300 ket 256 laeng dagiti nagturong iti nadakamat a venue.
Saan met nga inlibak ti coach a maysa kadagiti agbalbalin a rason iti dayto ti kinakurang iti tulong pinansyal a maaramat para kadagiti amin nga atleta.
Mainaig iti dayta, immuna metten a naipaay ti aggatad iti Php50K a cash assistance para iti nasao a delegasyon idi kalman manipod kenni Benguet Congressman Eric Go Yap.
Malakdsid iti dayta,nangipaay metlaeng daytoy iti daduma a kasapulan dagiti atleta kas iti taraon, ken daduma pay, kasta metten ti inaramat dagitoy para iti panagbiaheda manipod Probinsya iti Benguet agingga iti Ninoy Aquino International Airport(NAIA).
Iti agdama,maika-57 ti delegasyon iti Benguet nu sadino, addaan dagitoy iti pakabuklan a lima a medalya a buklen iti maysa a gold, dua a silver, ken dua a bronze.//Bombo Rob Dominguez
