Agsagsaganan ti delegasyon ti Rehiyon Cordillera para iti mapadpadaanan a Palarong Pambansa 2025 a maangay sadiay Laoag City, Ilocos Norte inton Mayo 24 agingga Hunyo 2, iti agdama a tawen.
Iti pannakiuman ti Bombo Radyo kenni Edgar Madlaing-Sports Coordinator ti Department of Education-Cordillera, kinunana a buklen iti 830 ti delegasyon ti Cordillera.
Sigun kenkuana, pakabuklan iti 560 dagiti atleta no sadino kaadduan ditoy ket agtaud iti siudad ti Baguio, sarunuen ti Benguet, Abra ken dadduma a probinsya iti rehiyon.
Dagiti atleta a naituding a makipaset iti nasao a palarong pambansa ket dagiti nangabak iti kaleppas a Cordillera Administrative Region Athletic Association wenno CARAA meet.
Naituding met nga agturong ti delagasyon sadiay Laoag inton Mayo 18 tapno adda ti panawenda a makapag-adjust iti klima sadiay.
Sigun kenkuana, kanya-kanya ti panagrubwat dagitoy tunggal probinsya agsipud ta saan dagitoy nga agkakaasideg.
Agsanay met dagitoy inton Mayo 19 agingga Mayo 23, sakbay nga opisyal nga agrugi ti nasao nga ay-ayam.
Innayonna pay nga adda dagiti medical team a magapu sadiay Laoag metlaeng ken kadagiti dadduma pay nga opisina kasta metten nga adda dagiti inimbitaran dagitoy a trainor manipud iti national.
Malaksid iti dayta, adda metten dagitoy naituding a beleting area dagitoy no sadino adda metten dagiti maaramat nga aircon kasta metten dagiti electric fan.
Namnamaenna met nga agballigi dagitoy inton madanun ti nasao nga ay-ayam.
Kabayatanna, naituding met nga agserbi kas kangrunaan a bisita iti nasao nga ay-ayam ni President Ferdinand Marcos Jr.
