Impakaammo ti Baguio City Buildings and Architecture Office (CBAO)a naipasardeng ti demolisyon a naisayangkat kadagiti mapapati nga ilegal nga estruktura idiay Naguilian Roda idi kalman, Hunyo 15.
Daytoy ket kalpasan a naipaulog ti Temporary Restraining Order (TRO) iti nasao nga operasyon. Apaman a naiparang ti nasao a TRO, napull-out dagiti demolition team iti nasao a pasdek.
Iti pannakiuman ti Bombo Radyo kenni Engr. Donald Gas-ib, dadaulo ti Investigastion and Demolition Division ti CBAO, inlawlawagna a nangrugi ti demolisyon iti agsapa idi kalman.
Nupay kasta, nakaawatda iti Temporary Restraining Order (TRO) pasado alas-11 metlaeng ti agsapa.
Gapu iti dayta, dagusda nga impasardeng ti nasao nga operasyon ken inikanda ti gundaway dagiti maseknan tapno iyebkasda met ti bennegda.
Sigun kenni Engr. Gas-ib, dumanon iti 15 agingga 17 nga estrukura ti maapektaran iti nasao a demolisyon.
Innayonna nga, addun a notice ken demolition conference ti naisayangkat-umdas kuma a panawen para kadagiti maseknan tapno inyebkasda dagiti kaso da.
Pinasingkedan ni Engr. Gas-ib a nasurot ti umno a proseso ti operasyon babaen iti pannakitinnulong dagiti nagduduma nga ahensya kas iti Commission on Human Rights, barangay officials, Office of the City Social Welfare and Development, ken dagiti pulis tapno masigurado a nalinteg ken naurnos ti pannakaipatungpal ti nasao nga operasyon.
” Adda met dagiti counterpart tayo nga government agencies nangnangruna unay dagitoy CHR, adda ti dua nga representatives da idiay, ti barangay, Office of the City Social Welfare and Development, kasta met dagitoy da pupulis. ” , sigun kenni Engr. Gas-ib.
Kabayatanna, imbinglay met ni Engr. Gas-ib a dumanon iti agarup 40-70 a reklamo ti maaw-awat ti opisinada tunggal bulan.
Innayo daytoy nga iti kaso ti Naguilian, awan ti maipaay ti relocation.
Nupay kasta, dinakamatna nga apaman a ma-assess dagiti agreed parties ken nakitada nga agtennagda kadagiti ‘homeless and underprevileged’, adda ti ipaay ti agpademolish wenno ti gobyerno ti siudad a gatad a mabalinda nga aramaten kas maituno iti ngem RA 7279
Pinalagipanna met dagiti umili nga agatendarda kadagiti maisayangkat a pre-demolition conference ken agalada kadagiti building permits dagitoy tapno mapagtutongtongan dagiti isyu ken pakaseknanda tapno maliklikan dagiti aberya ken parikot iti masakbayan ken kabayatan iti demolition. //edited BOMBO KHEY
