BAGUIO CITY – Nangrugin ti dengue season ita a tawen kagiddan ti panawen ti tudo.
Iti panakiyuman ti Bombo Radyo kenni Dr. Rowena Galpo, dadaulo ti City Health Services Office, kinunana a peak season ti dengue wenno panag-adu ti dengue ti bulan ti Hunyo agingga inton Oktobre ita a tawen.
Sigun kenkuana, mangrugi manen a maadda dagiti breeding sites wenno dagiti lugar a mabalin a pagitlogan dagiti lamok babaen kadagiti maurnong a danum.
Innayonna a bambantayanda ita dagiti kaso ti dengue iti siudad nangruna ta manipud Enero agingga Mayo ti agdama a tawen ket ngimmato iti 76.9 percent ti bilang dagiti kaso ti dengue a nailista ti opisinada.
Dinakamatna a kadagiti kapada a bulan iti napalabas a tawen ket nakailistada laeng iti 64 a kaso ti dengue infection bayat nga ita ket nagbalinen a 114 a kaso ti dengue.
Gapu iti daytoy, ibalbalakad ken ipalpalagip manen ni Dr. Galpo ti panagaramid kadagiti addang tapnu madadael dagiti banag a mabalin a pagpaaduan dagiti lamok, ti panangsalwad iti bagi manipud iti panagkagat ti lamok ken ti panagpataming iti doktor no mapasaran ti dua nga aldaw a gurigor nga awanan met ti nalawag a rason.
Innayonna a rugrugianda manen ti kampanya kontra iti dengue kadagiti babbarangay iti siudad ken ti pananginspeksionda kadagiti aglawlaw dagiti babbalay.
Kabayatanna, nangiwarasda iti treated curtains kadagiti pagadalan ti elementarya ditoy siudad ti Baguio.
Sigun kenni Dr. Galp, impeksa dagiti mannursuro a nakatulong dagiti treated curtains tapnu saan a makauneg iti silid pagadalan dagiti lamok.
Innayonna a no agpaso dagiti treated curtains ket agipaayda manen iti maisukat kadagitoy.
