Nainget a kidkiddawen ti Department of Environment and Natural Resources–Cordillera kadagiti residente ken iti publiko a liklikan iti lugar iti nagswekan iti maysa a fixed-wing trainer aircraft idiay Sitio Cabuyao, Poblacion, Tuba, Benguet, a masarakan iti uneg iti Mount Santo Tomas Forest Reserve ken Marcos Highway Watershed Forest Reserve.
Sigun iti DENR-CAR, ti panagsarungkar wenno saan nga otorisado a panagserrek iti lugar ket mabalin a mangitunda iti pangta iti kinatalged iti publiko ken makibiang iti agtultuloy nga imbestigasion dagiti otoridad.
Makikikoordinaren iti ahensia, babaen iti Community Environment and Natural Resources Office–Baguio, iti Tuba Municipal Disaster Risk Reduction and Management Office, Bureau of Fire Protection–Tuba, ken dagiti security forces tapno masigurado ti nasayaat a panangimanehar iti insidente.
Nu malpasen ti inisial a proseso iti imbestigasion iti Philippine Air Force, Philippine National Police, ken Scene of the Crime Operatives ken maideklara a mabalin ti limitado a panagserrek iti lugar, dagos a mangisayangkat iti DENR-CAR iti environmental assessment tapno maamuan ti posible nga epekto iti insidente iti aglawlaw.
Karaman kadagiti mabambantayan ti pangta ti posible a panagtagas kadagiti kemikal wenno toxic fluid, pangta iti uram kalpasan ti impact, ken pannakadadael iti daga ken canopy iti kabakiran.
Mangipatungpal metlaeng ti ahensia kadagiti addang para iti environmental containment ken remediation, karaman ti posible a panagdalus iti kontaminado a pagayusan iti danum, ken panagikkat iti naapektaran a daga tapno maliklikan ti panagwaras iti kemikal.
