Pormal a nangipila ti kaso a cyber libel idiay Makati City Prosecutor’s Office ni Agriculture Secretary Francisco P. Tiu Laurel Jr. kontra kadagiti sigud a miyembro ti Philippine marines ken ti abogado dagitoy a ni Levito Baligod gapu iti akusasyon dagitoy nga adda pakainaigan ni Laurel, Jr. iti agricultural smuggling ken iti pannakaideliver ti male-maleta a kwarta kadagiti sumagmamano nga opisyal ti gobyerno.
Inlawlawag ti agriculture secretary a rimmuwar ti nasao nga isyu kabayatan iti maysa a press conference no sadino dinakamat dagiti sigud a Philippine marine members ti nagan daytoy iti pannakaideliver ti kwarta kadagiti sumagmamano nga opisyales.
Nainget a pinaglibakkanna ti nasao nga akusayon.
Kabayatanna, nangipila met laeng daytoy ti nagsina a reklamo kontra kenni sigud nga Bicol Partylist Representative Zaldy Co gapu iti akusasyon daytoy nga adda pakainaigan ti agriculture iti onion importation ken smuggling iti pagilian kadua ti first lady ken kabsat daytoy a ni Martin Araneta.
Sigun iti agriculture secretary, ti panangipilana ti reklamo kontra kenni Zaldy Co ket panangkaritna kenkuana nga agparang ken paneknekanna dagiti akusasyon daytoy. //bombokcs