Binallaagan ni Department of Budget and Management (DBM) Secretary Mina F. Pangandaman ti publiko nga agannad kadagiti manangallilaw wenno “scammers” nga agkiddaw iti dakkel a gatad ti kuarta a mangibagbaga nga opisial ti Department of Budget and Management (DBM).
Kasaruno daytoy iti insayangkat nga operasion ti National Bureau of Investigation (NBI) a nagresulta iti pannakatiliw ti walo nga indibidual, nga agpammarang nga opisial ti nasao nga ahensia.
Nakemmeg dagiti suspek, kalpasan a naduktalan dagiti otoridad a maysa kadagitoy ti nangiyam-ammo iti bagina, kas undersecretary ti nasao nga ahensia a nagpamarang nga addaan ti special projects iti ahensia ken inkarina ti P1.3 Billion a balor ti proyekto iti biktima.
Gapu iti dayta, guyguyuguyen ni Pangandaman ti publiko nga agannad ken dagus nga ireportda kadagiti otoridad, no adda ti umasideg kadakuada a mangibagbaga nga opisial wenno manipud iti Department of Budget and Management (DBM).
