Binalakadan ti Department of Foreign Affairs dagiti amin a Pilipino idiay Syria a taginayonenda ti komunikasion iti Philippine Embassy sadiay Damascus iti baet ti naipadamag a pannakatnag ti rehimen ni Syria President Bashar al-Assad.
Iti statement nga inruar ti Department of Foreign Affairs, impeksada ti pakaseknanda seknan iti sitwasion dagiti Pilipino idiay Syria ken imbalakadda ti naan-anay a panagannad ken agtalinaed iti komunikason dagitoy iti embahada ti Pilipinas.
Kiniddaw pay ti nasao nga ahensia iti maseknan nga agteppel ken agkedked iti kanayonan a kinaranggas, tapno maliklikan ti ad-adu pay a pannakadangran ken pannakatay dagiti sibilian.
Dagiti amin a Pilipino idiay Syria ket mabalin a tumawag iti opisial a numero dagitoy (0949-155557, 0949-155567) wenno agturong laeng iti pe.damascus@gmail.com.
Impasigurado ti Department of Foreign Affairs nga agtultuloy ti panagmonitorda iti kasasaad ti Syria bayat nga indeklara dagiti rebelde a naparmek ni Assad ken naaladan ti kontrol ti Damascus.
Mapapati a pimmanaw ni Assad idiay Damascus iti saan nga ammo a destinasion idi kalman.
Gapu iti dayta, adu a tattao ti naimatangan a magmagna iti Al-Rawda Presidential Palace nu sadinno, dadduma kadagitoy ti nakaawit ti furniture manipud iti uneg.
Sigun kadagiti rebelde, nawayawayaan dagiti balud manipud iti dakkel a pagbaludan iti ruar ti Damasco a nakaibaludan ti rinibribu a tattao.
