Binalakadan ti Department of Health (DOH) ti publiko nga agannad kontra iti influenza-like illness nga agwaras gapu iti nalamiis a panawen a manamnama nga agpaut agingga iti bulan ti Pebrero.
Sigun iti nasao nga ahensia, kadawyan a nalaka nga agwaras ti nasao a sakit bayat a nalamiis ti paniempo.
Iti baet dayta, kinuna ti Health Department babaen kenni Health Assistant Secretary Albert Francis Domingo nga awan pay ti panagngato ti influenza-like cases iti laksid dagiti kaso dagiti tattao nga addaan iti panateng, gurigor, ken sakit ti bagi.
Maibasar iti monitoring ti Department of Health (DOH), 5,789 nga influenza-like cases ti nailista manipod idi Enero baente otso.
Ti nasao a bilang ket limapulo ket uppat a porsiento a nababbaba iti agpada a panawen idi tawen 2024 idi nakairekord ti nasao nga ahensia ti 12,620 nga influenza-like cases.
Inyunay-unay ti Department of Health (DOH) a regular nga agugas ti ima, aginom ti pito agingga walo a baso ti danum iti tunggalaldaw, mangan ti nasustanisa a taraon, ken maturog iti innem agingga walo nga oras iti tunggal aldaw.
Napalagipan pay ti publiko nga agtalianed iti pagtaengan wenno agisuot ti facemask nu makapaspasar ti sintomas ti nasao a sakit.
