Madandanagan ita ti Department of Health (DOH) gapu iti agtultuloy a panagngato ti kaso ti chronic kidney disease (CKD) iti pagilian.
Sigun iti DOH, saan laeng a dagiti natataengan ket agsagsagaba iti nasao a sakit nu di ket karaman metten dagiti ubbing.
Gapu iti daytoy, immapela ti nasao nga ahensiya a nasken a papigsaen manen dagiti programa a nakapukos iti primary care ken prevention iti entero a pagilian.
Innayon pay ti Health Department a kasapulan metlaeng a baliwan ti lifestyle nangruna kadagiti ubbing kas iti panangkissay kadagiti ipapauneg a taraon nga addaan iti sugar content.
Malaksid iti dayta, nasaysayaat nu maital-o ti pannangan kadagiti nasusustansiya a taraon tapno maliklikan ti sakit ken panaggastos iti dakkel a kwarta gapu iti panagpaagas.
