Nagballaag ti Department of Health (DOH) iti publiko seknan iti nadumduma a sakit a posible a mapasaran kabayatan ti panagtutudo.
Sigun iti nasao nga ahesia, kaadguan a naireport ti sakit a leptospirosis kabayatan dagiti typhoon ken panagtutudo a napasaran ti pagilian idi napalabas a tawen.
Malaksid iti dayta, masansan ti uyek, panateng, diarrhea, influenza, ken dengue iti wet seasons.
Gapu iti dayta, idagdagadag ti DOH iti publiko a patibkeren ti immune systems.
Sigun kenni DOH spokesperson Asec. Albert Domingo, nasayaat a liklikan dagiti narurugit a lugar, aramiden ti personal hygiene, agaramat iti nalinis a danum, mangan iti umdas, ag-ehersisyo, papigsaen ti immune system ken addaan iti disiplima, tapno maliklikan dagiti nasao a sakit.
Kabayatanna, immunan nga inwaragawag ti PAGASA a posible a dumanon iti 11 agingga 20 a tropical cyclones ti sumrek iti pagilian, kadagiti nabatbati a bulan ti agdama a tawen.
