Ikonkonsidera ita ti Department of Migrant Workers ti deployment ban wenno panangiparit iti panagturong dagiti Pilipino idiay Kuwait.
Kasaruno daytoy ti ipupusay dagiti dua nga Overseas Filipino Workers a da Dafnie Nacalaban ken Jenny Alvarado iti nasao a pagilian.
Immunan a naipadamag a mapukpukaw ni Nacalaban idi Oktobre ngem nasarakan ti bangkayna iti pagtaengan ti maysa a Kuwaiti individual.
Simmaruno met a naipadamag ti ipupusay ni Alvarado gapu iti coal smoke inhalation iti uneg ti pagtrabtrabahoanda nu sadino pimmusay metlaeng dagiti dadduma a katrabahona a Nepalese and Sri Lankan.
Ad-adda a dimmagsen ti rikna ti maseknan a pamilya idi nakitada a saan a ti bangkay ni Alvarado ti naisangpet iti pagilian nu di ket bangkay ti maysa a foreigner.
Sigun iti Department of Migrant Workers, iparparitda iti agdama ti panagturong dagiti first-timers domestic workers idiay Kuwait.
Ikonkonsidera pay ti gobyerno ti panangipatungpalda iti naing-inget a pagalagadan sakbay a maideploy dagiti Pilipino iti dadduma a pagilian.
Maibasar iti kaudian a datus, agarup 215,000 nga OFW ti adda ita idiay Kuwait.
