Binallaagan ni Department of Social Welfare and Development (DSWD) Secretary Rex Gatchalian ita nga aldaw dagiti opisiales ti barangay a saanda a gundawayan ti cash assistance nga ipaay ti gobierno kadagiti benepisiario.
Kasaruno dagiti report a naawat ni Gatchalian a nakaawat ti maysa a benepisiario ti tulong ti gobierno iti Davao del Sur iti P10,000
Nupay kasta, mapapati nga inala dagiti opisiales ti barangay ti P8,500 a kuartana ket nabati laengen ti P1,500.
Sigun kenni Gatchalian, ballaag daytoy kadagiti amin a mangpangpanggep a manggundaway dagiti nakukurapay a Pilipino gaputa awan ti karbengan dagitoy.
Gapu iti napasamak, mangipila ti Department of Social Welfare and Development ti pormal a reklamo iti nasao nga insidente.
Inlawlawag ti nasao nga opisial a ti insidente ket saan a napasamak bayat ti panangipaay ti cash assistance iti payout center ti nasao nga ahensia.
