--Ads--

BAGUIO CITY —┬áNakasaganan ti Department of Education (DepEd) – Cordillera para iti maangay a 2018 Cordillera Administrative Region Athletic Association (CARAA) Meet sadiay probinsia ti Abra.

Sigun iti ahensia, mangrugi ti tinawen a panagbabalubal dagiti atleta iti rehion inton Pebrero 4 ken agleppas daytoy inton Pebrero 9.

Kinuna ni Dr. Agustin Gomowang, dadaulo ti Education Support Services Division ti DepEd-Cordillera nga addan dagiti nabigbig a pagdagusan dagiti atleta ken dagiti coaches dagitoy manipud iti nagduduma a probinsia iti rehion, pakairamanan ti siudad ti Baguio.

Kinunana nga inton Pebrero 2 ket adda ti refresher course para kadagiti officiating officials dagiti ay-ayam tapnu maipalagip manen dagiti responsibilidad ken akem dagitoy.

Mangrugi met ti CARAA Meet babaen iti parada dagiti partisipantes iti malem ti Pebrero 4.

Naamuan nga adda met dagiti special awards a maipaay kadagiti delegasyon kas iti Cleanest Billeting Area, Eco-Friendly ken Mosty Disciplined.

Sigun met kenni DepEd-Cordillera regional director May Eclar, agtultuloy paylaeng ti pannakipatangda iti provincial government ti Abra tapnu maipanamnama a naannayas ti panagrugi ti ay-ayam.

Kinunana a dumanon iti P800,000 ti inlatangda a pondo para iti CARAA Meet ita a tawen malaksid pay iti bukod a pondo dagiti nagduduma a division offices ken ti counterpart dagiti maseknan a lokal a gobyerno.

Manamnama a 7,000 agingga 8,000 ti pakabuklan a bilang dagiti delegado iti 2018 CARAA Meet.