BAGUIO CITY – Agtultuloy nga iyap-apela dagiti jeepney drivers ken operators iti lokalidad ti kanayonan a plete kagiddan ti ngumatngato a presio ti produkto a petrolyo.
Sigun kenni Sixto Francisco, maysa a jeepney driver, patgan koma ti maseknan nga ahensia ti kiddawda a maipangato ti minimum a plete tapno adda ti maiyawidda iti pamilyada.
Sigun met iti LTFRB-Cordillera, nangisumiterdan ti petision iti Central Office para iti maysa a peso a provisional increase kadagiti Public Utility Jeepney iti rehion.
Iti kanito a mapatgan daytoy, agbalinen a P10 ti minimum a plete kadagiti parapubliko a jeep.
Impaganetget ti ahensia a saan a mabalin nga agsingir dagiti PUJ association, drivers ken operators iti nasursurok pay ngem iti P9 a minimum a plete agingga nga awan ti pammalubos dagitoy.
Imballaagna a mapatawanan ti kaskenan a pannusa dagiti iligal a mangipangato ti plete.
