Nabang-aran ti legal counsel ken ti pamilya dagiti biktima iti maatap nga extrajudicial killings iti nagbalin a pangngeddeng iti International Criminal Court(ICC)a saan a patgan ti kiddaw nga interim release iti kampo ni sigud a president Rordrigo Duterte.
Sigun kenni Atty. Kristina Conti, maragsakanda ta patienda a ti desisyon iti international tribunal ket nadalos, pulido, ken nalawag.
Innayonna a mangipakita daytoy iti umno a panagraem iti ICC ken panagtalek daytoy kadagiti biktima kasta metten iti balanse a konsiderasyon iti argumento iti bangir a benneg wenno ti akusado.
Sigun kenni Atty. Conti, iti agdama ket mabalindan nga agpokus kadagiti dua a kangrunaan nga isyu iti kaso ti sigud a presidente.
Pakairamanan dayta ti karit seknan iti jurisdiction gapu ta maibagbaga nga awanan iti bileg ti ICC a tingitingen ti nasao a kaso, ken ti pakaseknan maipapan iti maibagbaga a saan a kabaelan ni FPRRD a sumango iti panagdengngeg.
Patien dagitoy nga impakita iti international tribunal a saan daytoy a nakumbinsir a saan nga aglibas ti sigud a presidente nu mawaya-wayaan nangruna ket nadagsen ti kaso a naipila kontra kenkuana ken patienda nga addaan daytoy iti pinansyal a kabaelan tapno aramiden ti nasao a banag.
