BAGUIO CITY – Ur-urayen ita ti Traffic Enforcement Unit ti Baguio City Police Office ti desisyon ni Mayor Benjamin Magalong no maituloy ti panakairikep ti pasang-at a kalsada ti Session Road.
Sigun kenni PMaj. Oliver Panabang, dadaulo ti nasao nga unit ti pulisya, naamuanda nga uppat laeng a domingo a mairikep ti pasang-at a kalsada ti Session Road kas maibasar iti resolusyon a pinirmaan ti City Council.
Kinunana a saan daytoy a maitunos iti immuna a naiwaragawag a mairikep ti nasao a kalsada tunggal domingo iti las-ud ti innem a bulan.
Nupay kasta, nangisubmitir manen ni Mayor Magalong iti surat para iti panakaituloy latta ti plano a mairikep ti pasang-at a kalsada ti Session Road iti innem a bulan.
Sigun pay kenni PMaj. Panabang, urayenda ti pinal a desisyon mainaig iti nasao a banag sakbay met nga ipatungpalda ti mandatoda a mangwanawan ken mangbantay iti trapiko sadiay. (-with Bombo Brigitte Marcasi)
