BAGUIO CITY – Nabukel ti Disiplina Muna Brigade iti siudad ti Baguio babaen iti technical working group para iti panakaital-o ti kultura ti disiplina iti tunggal umili tapno agballigi ti laban kontra iti COVID-19.
Sigun kenni Baguio City Mayor Benjamin Magalong, naipasdek ti Disiplina Muna Brigade iti tunggal barangay ditoy siudad ti Baguio para iti panakaipatungpal kadagiti minimum health standards ken dadduma pay a programa ti lokal a gobierno.
Innayonna a kasapulan ti disiplina iti tunggal umili tapno agballigi ti siudad kontra COVID-19.
Kinunana a dakkel ti maitulong ti nasao a programa gapu ta masapul nga agrugi iti barangay level ti panangparmek iti COVID-19.
Nagsapata ti 640 a miembro ti Disiplina Muna Brigade nga idadauluan dagiti kapitan ti barangay iti siudad idi kalman.
