Nasuspendir ken manamnama a maikkat iti pwesto ti maysa nga engineer ti Department of Public Works and Highways (DPWH) a natiliw gapu iti mapapati a pananggandatna a mangpasoksok iti P3.126 million iti maysa a kongresista idiay Batangas.
Ti suspek ket ni Abelardo Calalo, 1st District Engineer ti DPWH-Batangas a natiliw iti maysa nga operasyon idiay Taal, Batangas.
Maibasar iti inisyal nga imbestigasyon, maatap nga indiaya ni Calalo ti P3.126 million kas pasoksok kenni Batangas 1st District Representative Leandro Leviste tapno lapdanna ti maipatungpal nga imbestigasyon iti iregularidad kadagiti proyekto ti DPWH iti nasao a distrito.
Iti agdama ket adda ti suspek iti kustodiya ti Taal Municipal Police Station ken sumango daytoy iti kaso a korupsyon iti sidong ti Revised Penal Code, ken panaglabsing iti Anti-Graft and Corrupt Practices Act iti Batangas Provincial Prosecutor’s Office.
Kabayatanna, impetteng met ni DPWH Secretary Manuel Bonoan nga iti kanito a mapaneknekan dagiti alegasyon kontra iti nasao nga inhenyero ket rumbeng laeng daytoy a matiliw ken awan ti planona a bisitaen iti pagbaludan.
Impeksa ni Bonoan a posible nga adda ti maipatungpal a “cleansing” iti uneg ti DPWH tapno maikkat dagiti corrupt nga empleyado ken opisyal ti nasao nga ahensiya.
