Pinasayaat pay ti Department of Migrant Workers ti bilateral labor relations wenno panagkadua ti pagilian a Finland babaen ti panagpinnirmada iti katulagan nga addaan panggep a siguraduen a nalinteg, “ethical,” ken “sustainable working conditions” dagiti Pilipino iti pagilian ti Europa.
Pinirmaan ni Department of Migrant Workers Sec. Hans Leo Cacdac ken Economic Affairs and Employment Minister Arto Olavi Satonen ti Finland ti Joint Declaration of Intent on the Mobility of Filipino Specialists ken Skilled Workers to Finland idi kalman.
Ti katulagan ket mangparang-ay pay iti panagtitinnulong ti dua a pagilian babaen ti pannakabukel ti komite a buklen dagiti opisial ti gobierno ti Pilipinas ken dagiti kakaduada a taga-Finland.
Napaliiw ni Cacdac a ti kapadasan dagiti rinibribu nga OFW kadagiti Finnish employers ket “excellent” wenno nasayaat ken “very harmonious”.
Para met iti biang ni Satonen, kinunana nga adda laeng ti dua a ribon a mangmangged a Pilipino idiay Finland ken kinunada a “napnekda” iti panagtrabahoda sadiay.
Ti tangdan dagiti mangmangged iti nasao a pagilian ket dumanon iti €1,600 agingga €3,500 tunggal bulan, wenno P96,000 agingga P211,000.
