Inyunay-unay ni Department of National Defense (DND) Secretary Gilberto Teodoro, Jr. ti kinapateg ti panagrespeto iti international law ken panangpatibker ti kooperasyon seknan iti seguridad kabayatan iti maika -13 ADMM-Plus idiay Lapu-Lapu City, Cebu idi kalman.
Kagidan dayta, impeksana ti napateg a papel ti international community iti panangsalwad kadagiti Overseas Filipino Workers (OFWs) ken marino nga addaan iti dakkel a kontribusyon iti world economy nangnangrun iti panawen ti emerhensiya kadagiti dadduma a pagilian nga ayan dagitoy.
Naipatungpal ti ADMM-Plus kas paset iti agtultuloy a panag-host ti Pilipinas kadagiti serye iti panagtataripnong kadua dagiti kangrunaan a partners kas iti Estados Unidos, China, ken Japan.
Panggep daytoy a papigsaen ti diplomasya ken panangtalantan kadagiti nababara nga isyu kas iti seguridad idiay West Philippine Sea, ken dadduma pay.
