Idagdagadag iti Department of Health Cordillera (DOH-CAR) ti publiko iti panagtalinaed a naridam kontra iti leptospirosis gapu iti agtultuloy a panagngato iti kaso daytoy gapu iti agtultuloy a panagtudo nga intunda iti Habagat.
Maibasar iti kaudian a report, addan iti 196 cases iti leptospirosis iti rehiyon, nangat-ngato iti 15% no idilig idi napalabas a tawen.
Kasta met a nakairekord ti ahensya iti 9 a bilang ti pimmusay manipud Enero agingga Agosto iti agdama a tawen gapu iti leptospirosis.
Nagpalagip met ni DOH-CAR Nurse V Clark Dizon iti publiko nangruna kadagiti na-expose iti floodwaters wenno dagiti nabasa iti danum ti tudo ken makarikna iti sintomas ti leptospirosis nga agpakonsulta a dagus kadagiti kaasitgan a health facilities kadagiti lugarda.
Maipalagip nga iti rehiyon, addan dua nga ospital a na-activate kas Leptospirosis Fast Lanes a masarakn idiay Far North General Hospital and Training Center sadiay Luna, Apayao, ken Luis Hora Memorial Regional Hospital sadiay Bauko, Mountain Province. | via Bombo Khey Reparip
