Nagballaag ti Department of Health–Cordillera kasaruno ti agtultuloy a panagngato ti kaso ti hepatitis B iti rehion.
Sigun kenni Darwin Babon, Regional Coordinator for sexually transmitted infections ti DOH-Cordillera, manipud iti 123 a kaso ti reactive hepatitis B idi 2024 ket ngimmato iti 159 a kaso idi napan a tawen.
Dinakamatna a kaadoan kadagiti kaso ket agtawen iti 25 agingga 29 pakairamanan dagiti masikog a babbai.
Mangipaspasimudaag ti nangato a bilang iti agtultuloy a peggad ti nasao a sakit iti economically productive age groups.
Kaaduan kadagiti screening ket naisayangkat iti siudad ti Baguio, Abra, Benguet, Ifugao, Mountain Province, ken Apayao, bayat a nababa idiay Kalinga.
Ti hepatitis B ket maiyakar babaen iti dara ken body fluids ngem maliklikan daytoy babaen iti panagpabakuna.
Imbinglay ni Babon a tapno marisut ti pakaseknan, ikagkagumaan ti Department of Health a padakkelen ti suplay ti test kits, pannakikoordinarda iti PhilHealth para iti posible a benefit package, ken papigsaenda ti surveillance, prevention, ken access iti diagnosis ken panagpaagas.
Panggep ti ahensia a madanon ti global target ti elimination iti viral hepatitis iti tawen 2030.
