Impaulog ti Department of Health (DOH) ti napabaro a pakdaar kontra iti posible a panagwaras dagiti sakit iti panawen ti panagtutudo, pakairamanan ti dengue, leptospirosis, ken sakit a mayakar babaen ti danum, kagiddan ti agtultuloy a panagtudtudona ken panaglayus iti adu a paset ti pagilian.
Impalagip ni DOH spokesperson Assistant Secretary Albert Domingo iti publiko nga aramidenda ti ekstra a panagannad tapno maliklikan ti sakit ken agkiddaw iti nasapa a “medical consultation” nu agparang dagiti sintomas.
Kangrunaan nga imbalakad ni Domingo ti maipapan iti leptospirosis, a mabalin a maiyakar babaen kadagiti danum ti layus a kontaminado iti isbu dagiti ayup.
Kinunana a mabalin a dumanon iti dua a lawas ti panagparang dagiti sintomas a kas ti panaggurigor, muscle pain, jaundice, ken dark-colored nga isbu wenno ti rugit ti maysa a tao.
Kabayatanna, iti baet nga agtaltalinaed a kontrolado ti kaso ti dengue, kinuna ni Domingo a bantayan daytoy ti DOH.
Impaganetgetna ti kinapateg ti community clean-up drives ken household vigilance.
