BAGUIO CITY – Nakailistan ti Department of Health iti innem a kaso ti fireworks-related injuries wenno pannakadangran gapu iti paputok iti rehiyon Cordillera sumagmamano nga aldaw sakbay ti baro a tawen.
Manipud iti innem a pakabuklan a kaso, uppat ditoy ket nairekord iti Baguio City ken saggaysa iti probinsiya ti Kalinga ken Mt Province.
Dagiti biktima ket bin-ig nga ubbing nga agtawen iti pito agingga sangapulo ket uppat.
Tallo kadagiti ubbing a biktima ti nagsagrap ti sugat iti matada bayat a dagiti tallo pay a biktima ket nagsagrap iti sugat iti nagduduma a paset ti bagida.
Manipud iti innem a biktima, dua kadagitoy ti naadmitar iti ospital.
Kasaruno iti daytoy, nagpalagip manen ti Department of Health iti publiko a liklikanda ti panagaramat iti iligal a paputok tapno maliklikan ti kapada nga insidente.
