Nangibinglay ti Department of Health kadagiti kasapulan a tips tapno matulongan ti publiko nga agtalinaed a natalged manipud kadagiti sakit a mainaig iti pudot, kagiddan ti iseserrek ti panawen ti tikag.
Iti panagsaritana iti news forum sadiay Quezon City idi kalman, impaganetget ni DOH spokesperson Assistant Secretary Albert Domingo ti kinapateg ti umno a ventilation no adda iti uneg ti balay.
Impaganetgetna pay ti kinapateg ti hydration, ken imbalakadna iti publiko nga uminum iti pito agingga iti walo a baso a danum iti tunggal aldawtapno malapdan ti heat cramps, heat exhaustion, ken heat stroke.
Inyunay-unay pay ti nasao nga opisial ti kinapateg ti regular breaks wenno “heat breaks” tapno malapdan ti overheating.
Nu adda ti siasinoman nga indibidual a mangipakita iti heat-related illness, imbalakadna ti panangyakar kadagitoy iti nalamiis ken nalinong a lugar.
Insingasingna pay ti panangikabil iti cold compress iti tengnged, gurong, ken kilikili ken pananglukat kadagiti nairut a kawes tapno makatulong a mangpababa iti temperatura ti bagi.
Para kadagiti makipaspaset iti nagduduma nga aktibidad iti ruar, inrekomendarna nga isayangkat laengen dagitoy sakbay ti alas 9 ti agsapa wenno kalpasan ti alas kuatro ti malem apno maliklikan ti kangatuan a temperatura.
