BAGUIO CITY – Inadaptar ti munisipyo ti Sabangan, Mountain Province kas anak ni Department of Labor and Employment (DOLE) Secretary Silvestre “Bebot” Bello III.
Babaen iti maysa a resolusyon ti Sangguniang Bayan ti Sabangan ket indeklarada nga adopted son ti ili ni Bello.
Impaayanda ni Bello iti palayaw a “Malan-uya” a kaipapananna ket maysa a tao nga addaan ti nasayaat a kababalin ken kinatao.
Iti panagsarungkar ti DOLE Secretary sadiay Mountain Province, imbasa ni Sabangan Vice Mayor Dario Esden Sr. ti resolusyon a nangbigbig iti DOLE iti panangidaulo ni Bello gapu iti agtultuloy a panangsuportarda iti ili ti Sabangan babaen iti nagduduma a tulong.
Kinunada a gapu kadagiti nasao a tulong ket maibilang ni Bello a tribal leader a nakasagana a mangited iti pagkasapulan ti komunidadda sadiay.
Innayonda a daytoy ti rason no apay nga imbilang dagiti miembro ti Sangguniang Bayan ti Sabangan ni Bello kas maysa nga “e-sabangan”.
Itay laeng nabiit ket indauluan ni Bello ti payou ti Tulong Panghanapbuhay sa Ating Disadvantaged/Displaced Workers (TUPAD) Program ken panakaipaay ti dadduma a programa ti DOLE para iti Mountain Province iti seremonya a naangay sadiay Poblacion, Sabangan.
Naamuan a nakaawat ti Sabangan iti P47-M a pondo manipud TUPAD Program para iti panakaipaay ti emergency employment iti agarup amin a taga-Sabangan.
