Nagballa-ag ti Department of Science and Technology (DOST) kadagiti residente iti Cebu ken daduma pay a paset iti Visayas nga agridam ken agannad dagitoy kalpasan a nagtaud dagiti sinkhole ken bettak kadagiti daga kasaruno ti 6.9 a gingined.
Sigun kenni DOST Secretary Renato Solidum, kasapulanda nga adalen a naimbag ti kaadda dagiti sinkhole— nu magan kauneg daytoy ken nu posible a margaay ti daga tapno iti kasta ket makaaramidda iti umno a desisyon.
Naikonsulta metten daytoy iti Mines and Geosciene Bureau iti Department of Environment and Natural Resources a kangrunaan a mangipatungpal iti panagadal kadagiti sinkhole ken bettak kadagiti daga.
Malaksid iti dayta, kinuna ni Solidum a mangipatungpal dagitoy iti risk assessment tapno makabukelda iti umno a pakdaar nangruna nu asideg ti sinkhole kadagiti babbalay.
Kabayatanna,inlawlawag ti opisyal a kadawyan nga agtataud dagiti sinkhole nu dumaldalapos dagiti napipigsa a panagdayyeg iti daga.
