Nagpakdaar ti Department of Science and Technology – Philippine Institute of Volcanology and Seismology (DOST-PHIVOLCS) iti publiko seknan iti posible a panagbettak ken panagruar ti asupre manipud iti Bulkan Taal.
Maibasar iti Taal Volcano Advisory idi kalman, ngimmato ti bilang ti real-time seismic energy measurement (RSAM) ti nasao a bulkan.
Malaksid iti dayta, agarup 19 a ginggined ti nairekord manipud idi Agosto 9.
Kabayatanna, naobserbaran ti kalkalainganna nga asuk manipud iti main crater ti Taal.
Gapu iti dayta, nagpalagip ti Philippine Institute of Volcanology and Seismology (PHIVOLCS) iti publiko nga adda iti alert level 1 ti Bulkan Taal.
Kayatna a sawen a posible ti panagbettak daytoy a mabalin a mangiruar iti minor ashfall, lethal accumulation wenno pannakairuar ti volcanic gas.
Inyuna-unay ti PHIVOLCS a nainget pay laeng a maiparit ti panagturong iti Taal Permanent Danger Zone, nangruna iti aglawlaw ti main crater ken Daang Kastilla fissure.
