BAGUIO CITY – Imbitaran ti lokal a konseho ti Baguio dagiti opisyales ti Department of Transportation (DOTr) – Central Office ken dagiti Board of Directors ti Land Transportation Franchising and Regulatory Board (LTFRB) tapnu ipalawagda no apay a nangato unay ti plete kadagiti taxi units ditoy lokalidad.
Iti panakiyuman ti Bombo Radyo kenni Councilor Faustino Olowan, chair ti Committee on Laws iti City Council, kinunana a daytoy ti napagnumuan ti konseho kalpasan a nagparang iti sesyonda ni DOTr-Cordillera regional director Atty. Jose Eduardo Natividad.
Kinunana nga iti panagparang ni Natividad iti konseho ket impalawag daytoy a ti panagngato iti plete kadagiti taxi ditoy rehiyon Cordillera ket desisyon ti LTFRB-Central Office.
Kinunana a sungbat daytoy ti Board iti petisyon dagiti dadduma a taxi owners iti siudad a panakaipangato ti plete kadagiti taxi a rason met tapnu nangiruar ti DOTr iti administrative order para iti implementasyon ti desisyon ti LTFRB.
Sigun kenni Councilor Olowan, imbitaranda dagiti maseknan nga opisyales iti Central Office ti DOTr ken LTFRB tapnu dagitoy a mismo ti mangipalawag no anya ti formula a naaramat iti panakabukel ti taxi fare rate iti rehiyon.
Innayonna a ti nabukel a resolusyon ti konseho ket mays a Motion for Reconsideration iti taxi fare increase tapnu maipababa bassit ti plete kadagiti taxi iti lokalidad.
Mangnamnama pay ti konseho nga aksionan ti DOTr ken LTFRB ti mosyon dagitoy nangruna ta adu pay dagiti nasken a maikonsidera nangruna iti benneg dagiti agluglugan kadagiti taxi.
