[photo credit to owner]
BAGUIO CITY – Tumulong dagiti arkitekto manipud Saudi Arabia iti panakapabaro ken rehabilitasyon ti historical a Baguio Convention Center.
Sigun kenni Mayor Mauricio Domogan, makitaripnong kuma daytoy ken ti Department of Public Works and Highways (DPWH) – Cordillera kadagiti arkitekto manipud Saudi Arabia mainaig iti renovation ken rehabilitation ti pasilidad ngem saan a naituloy.
Kinunana a naitantan ti taripnong gaputa naad-addan iti official business ni DPWH – Cordillera regional director Engineer Nerie Bueno iti sabali a pagillian.
Innayonna a gapu iti daytoy ket naituding nga agpapatangda manen inton bigat.
Imbingayna a dakkel a sakripisyo ti ipaay dagiti nasao nga arkitekto para iti pannakapapintas ti nasao a pasilidad gaputa nababa laeng ti maipaay a sweldo dagitoy.
Kinuna ti mayor a pagsaritaanda no anya ti napintas a desinyo a mabaelan ti P180-M nga inisyal a pondo iti nasao a proyekto, partikular ti footprint ken interior design ti pasdek.
Tarigagay ti lokal a gobyerno a maisimpa ti natural lighting, ventilation ken sitting-capacity ti Convention Center a maka-akomodar iti 2,000 nga indibidual.
Innayonna pay a nabagaan met dagiti agop-opisina sadiay para iti temporaryo nga ipapanaw dagitoy apaman a marugian ti rehabilitasyon ti Baguio Convention Center.
