Nagkiddaw iti pammakawan ti management ti D’ Rising Sun Transport System Inc., gapu iti nagbalin nga aksyon ti maysa kadagiti driver dagitoy.
Iti video a naala itay agsapa iti Halsema Highway, makita a bimmaba ti bus driver ken immasideg iti simmardeng a blue elf truck.
Ditoy a dinanog ken kinarit ti bus driver ti driver ti elf truck.
Sigun met iti nasao a transport system, kanayon a bagbagaanda dagiti drivers dagitoy a pagtalinaedenda ti panagbalinda a professional ken agipakitada iti napintas nga aksyon.
Nupay kasta, inaklon ti management ti D’Rising Sun Transport System Inc., a saanda a kanayon a makontrol ti reaksyon dagiti driversda nu adda ti mapasaranda nga insidente.
Iti baet daytoy, impanamnama ti Transport system nga ipaayanda iti panusa ti kaskenan a driver.
Inyunay-unay pay ti maseknan a transport system a ti inaramid ti maysa kadagiti driver daytoy ket saan a mangipakpakita iti sibubukkel nga ugali wenno galad dagiti dadduma nga empleyado daytoy.
