BAGUIO CITY – Pimmusay ti maysa a driver kalpasan a natnag iti rangkis sadiay Sitio Tapak, Ampucao, Itogon, Benguet ti imanmanehona a bulk truck idi kalman.
Binigbig ni PCI Eugene Raymundo, hepe ti Itogon PNP, ti pimmusay a ni Jessie Masda Pucay, 30-anyos, naasawaan, residente ti Labilab, Loacan, Itogon, Benguet bayat ti imanmanehona a trak nga addaan plaka nga RLU 260 ket naglaon iti semento ken daytoy ket tagikua ti Camilo Trucking Services.
Kinunana a paturong ti nasao a trak ditoy siudad ti Baguio idi natinnag ti lugan iti rangkis nga addaan kauneg nga agarup 300 a metro.
Innayonna a ti helper ti nasao a truck a ni Jener Carias, 30-anyos ket naibarsak iti ruar bayat ti panakatnag ti trak iti rangkis.
Nabaelan met ni Carias a nakakalay-at agingga iti kalsada ken sadiay a nagkiddaw iti tulong iti maysa a motorista a nangiturong kenkuana iti Sto. Nino Hospital agingga a naiyakar daytoy iti Baguio General Hospital and Medical Center.
Impatungtpal met ti Itogon Municipal Police Station, ti rescue team ti Philex Mines ken dagiti umili ti retrieval operation iti bangkay ti driver a dagus a pimmusay gapu kadagiti nakaro a dunor a nasagrap ti ulo daytoy.
Naduktalan iti imbestigasyon a sakbay a nagbiahe dagiti dua ket naginom dagitoy iti arak isut gapuna a posible a daytoy ti rason iti saan a panangkontrol ti driver iti nasao a lugan.
