BAUKO, MT PROVINCE – Pimmusay ti maysa a lalaki kalpasan a natnag ti luganna ken nalmes daytoy iti karayan idiay Otucan, Bauko, Mt. Province itay agsapa, Oktobre 15, 2026.
Iti interview ti Bombo Radyo kenni Police Captain Carlito Salimbuat Ateneo, Acting Chief of Police ti Bauko Municipal Police Station, 7:30 itay agsapa, nakaawat ti istasyonda iti awag manipud iti Sabangan Municipal Police Station maipapan iti vehicular traffic accident a napasamak idiay Otucan, Bauko, Mt Province pakairamanan ti maysa a lugan.
Iti inisyal nga imbestigasyon, natnag ti lugan iti 70 metro ti kaunegna a rangkis manipud iti national road rason a nagduretso daytoy iti karayan.
Iti panagtinnulong dagiti nagresponde a personnel ti Bauko MPS, Sabangan MPS, BFP ken volunteers, narekober ti bagi ti biktima a saanen nga innaganan dagiti awtoridad.
Iti report ti doktor, pimmusay ti biktima gapu iti aphysia secondary to drowning. Naiyawid metten ti bangkay daytoy iti pagtaenganda idiay Sagada Mt Province.
Iti agdama ket agtultuloy pailaeng ti imbestigasyon dagiti awtoridad.
Kabayatanna, nagpalagip met ni PCapt. Ateneo kadagiti biahero nga agbalin dagitoy a defensive drivers ken kanayon a sukimatenda ti luganda sakbay nga agbiahe dagitoy.
