Napilaanen iti kaso a Reckless Imprudence Resulting in Homicide ti maysa a driver ti jeep a nakadungpar iti 28 anyos a rider sadiay Harrison Road, Baguio City idi kalman, September 28, 2025.
Iti panakiuman ti Bombo Radyo kenni PMaj. Marcy Grace Marron, Public Information Officer ti Baguio City Police Office, kinunana a na-inquest metten ti nasao a driver a nakabangga ken nakaatal iti biktima.
Sigun kenkuana, adda itan iti ikot dagiti otoridad ti nasao a driver ken maur-uray laengen ti commitment order tapno maiyakar daytoy iti Bureau of Jail Management and Penology ngem kinunana a nabiit laeng ti pananguray iti commitment.
Maipalagip a pimmisay ti agtawen iti dua pulo ket walo anyos a lalaki nga addaan iti pamilya ken annak a maysa a porter iti Baguio Public Market kalpasan a naatalan daytoy.
Sigun iti immunan a panakiuman ti Bombo Radyo kenni Eloiza Ruiz ti nanang ti biktima kinuna a paawid kuman ti anakna ti dayta a gundaway nga adaan iti imet a pasalubung para ti pamilyana idi napasamak ti aksidente.
Inladawan ti nanangna a nasingpet, nagaget ken daytoy laeng ti agtrabtrabaho para ti pamilyana rason a nasakit ken nadagsen ti rikna dagiti napanawan a pamilya ti biktima.
Impettengda a nasken a maipaayan iti hustisya ti napasamak ti anakna.
Kagiddan, agtultuloy ti panag-imbestiga ti kameng ti Baguio City Police Office iti nasao nga aksidente tapno makaala-da pay iti kanayunan nga impormasyon seknan iti nasao nga insidente.
Impetteng ni PMaj. Marron, nga awan pay ti iggem dagitoy a kopya ti video wenno dashcam maipapan ti napasamak nga insidente.
Gapu ti dayta umap-apela dagitoy nangruna kadagiti imbestigador ti panangisubmitir ti publiko a nakaala iti video iti napsamak nga insidente tapnu maktulong daytoy ti kaso.
Kabayatanna, mailawlawag met kadagiti publiko a saan a naladaw ken nabayagan dagiti pulis a nagresponde ti nasao nga insidente.
Daytoy ket kalpasan nga adda ti misunderstanding a napasamak iti social media a sumagmamano kadagiti netizens ti mangibagbaga a nabayagan dagiti kameng ti Baguio City Police Office a nagresponde ngem ti kina-agpayswanna adda dagiti proseso, sumagmmamano a rumbeng a maikonsedera ken maaramid sakbay a magaraw ti bangkay ti biktima gaputa saan a basta-basta a magaraw daytoy.//Bombo Noveh Organo
