Nakaruaren manipod iti kustodiya dagiti otoridad ti driver ti lugan a nairaman iti panakatnag ti maysa a lalaki nga estudyante manipod iti maysa a platform iti FPJ LRT-1 Station idiay EDSA Northbound.
Sigun iti Quezon City Police District (QCPD), saanen a maipilaan iti kaso ti nasao a driver kasaruno metlaeng ti panangbabalaw dagiti tattao kadagiti naipadamag a posible a mapilaan daytoy ti kaso a reckless imprudence resulting in homicide.
Inlawlawag ni QCPD director Police Brigadier General Randy Glenn Silvio a ti panangipasidongda iti driver iti temporary custody ket paset ti standard investigative procedures kadagiti kaso nu sadino ket adda dagiti pumuspusay.
Maipalagip nga idi February 11 ket pimmusay ti maysa nga indibidwal kalpasan a natnag daytoy manipod iti maysa a platform ti FPJ LRT-1 Station nu sadino,nairana a ti sumungad a lugan ti nagdiswanna rason a nadungpar metlaeng.
Kalpasan met a naadal ti CCTV footage iti nasao nga insidente ket kinuna ti kapulisan nga awan ti napasamak a negligence wenno panagbaybay-a iti benneg ti nasao a driver ti lugan.
Mainaig iti dayta,kinumpirmar metlaeng ti nagannak ti pimmusay nga estudyante a saanda a mangipila iti kaso kontra iti driver.
