BAGUIO CITY–Adda itan iti natalged a kasasaad ti driver ti truck a nadangran kalpasan nga aksidente a dinalaposna ti pito a nakaparada a lugan iti nagbeddengen ti Camp 7 ken Camp 8 sadiay Kennon Road, Baguio City idi parbangon.
Iti panakiyuman ti Bombo Radyo kenni Pol /Lt Col. Oliver Panabang, dadaulo ti Baguio City Traffic Enforcement Unit; kinunana a napasamak ti insidente pasado 12:00 itay parbangon.
Dinakamatna a nagtaud iti depaar ti BGH-Compound ti truck a naglaon iti darat nga inmaneho ni Richard Liwan Supino ken paturong iti deriksion ti Camp 7.
Nupay kasta, naawanan iti kontrol ti driver idi nakadanon daytoy iti batog ti maysa a pagtagilakuan sadiay Camp 8 a nagresulta iti panangipadalaposna iti inmanehona a truck kadagiti lugan a nakaparada iti igid ti kalsada.
Dagos met a naiyuman iti estasion ti pulisya ti nasao nga insidente a rinespondean ti BCPO Station 8 sakbay a naipaima iti Traffic Enforcement Unit.
Naiturong a dagos iti pagagasan ti driver kalpasan a nagsagrap iti dunor ngem dagos metlaeng a rimwar iti ospital.
Naituding met a maipasidong iti amicable settlement ti insidente.
Kagiddan iti daytoy, immapela manen iti publiko ni /Lt Col. Panabang iti panangkondision dagiti motorista iti lugan dagitoy sakbayda nga agbiyahe ken ti kanayon a panagridamda kadagiti kalsada kalpasan a naamwan a kangrunaan latta a rason ti panakapataud dagiti aksidente ket ti saan a naannad a panagmaneho dagiti motorista.
