BAGUIO CITY – Nakemmeg ti maysa a baro a drug personality target iti anti-illegal drug operation nga insayangkat dagiti pulis iti sangwanan ti maysa a restaurant sadiay Shilan, La Trinidad, Benguet idi malem kalman.
Binigbig ni PCI Benson Macli-ing, Chief of Police ti La Trinidad PNP, ti nakemmeg a suspek a ni Daryl Buyawe Dominguez, 28-anyos, tubo ti Baang, Bauko, Mt. Province ken agab-abang sadiay Boted, Tawang, La Trinidad.
Kinunana a nakumpiskar iti suspek ti pakabuklan nga uppat a sachet ti mapapati a shabu, P650, P1,000 a buy-bust money ken dadduma pay.
Nakemmeg ti suspek kalpasan nga inlakona iti pulis ti La Trinidad ti maysa a sachet ti maatap a shabu ken iti panangrekisar dagiti pulis kenkuana ket nakakumpiskarda ti tallo pay a shachet ti maatap a shabu.
Kabayatanna, nakemmeg ti maysa a menor de edad iti drug buybust operation nga impatungpal ti Drug Enforcement Unit sadiay Middle Quirino Hill, Baguio City idi kalman.
Ti suspek ket maysa a lalaki nga agtawen iti sangapulo ket pito.
Nakumpiskar kenkuana ti maysa a plastic sachet a naglaon ti mapapati a shabu, P500 ken maysa a cellphone.
