BAGUIO CITY – Nangrugin ita nga aldaw ti dry-run seknan iti panakailukkat ti turismo sadiay Sagada, Mountain Province.
Iti panakiuman ti Bombo Radyo Baguio, kinuna ni Mayor James Pooten Jr. a pasetan daytoy dagiti 30 nga indibidual nga agtaud iti nagduduma a probinsia ti Cordillera.
Inlawlawagna a panggep ti aktibidad nga ipadas ti kina-epektibo dagiti protocols a binukelda a maiyemplementar iti kanito a mailukat ti turismo sadiay.
Dinakamatna nga obserbaranda no epektibo dagiti protocols a nasken a suroten dagiti bisita no sumrekda iti munisipyo ken no agturongda kadagiti business establishments ken tourist sites.
Impettengna a babaen iti dry-run ket maamoanda dagiti epektibo a protocols a nasken a maiyemplementar ken maamoanda met dagiti protocols a nasken a baliwan ken papintasenda pay.
Karaman kadagiti binukelda a protocols ti panagrehistro dagiti bisita iti online, panangiparang dagitoy ti vaccination card ken negatibo a resulta ti RT-PCR test kadagiti border checkpoints nangruna kadagiti agtaud iti lugar a nakailista ti nangato a kaso ti COVID-19.
Imbinglayna pay a limitado laeng ti kapasidad nga akomodaren dagiti business establishement skas kadagiti hotel ken restaurants sadiay.
