Inlawlawag ti Department of Social Welfare and Development – Cordillera (DSWD-CAR) nga agtaltalianed nga accountable dagiti children in conflict with the law (CICL) bayat a dumaldalan dagitoy iti rehabilitasyo ken intervention idiay Bahay Pag-asa.
Sigun iti pablaak ti PIA-Cordillera, impetteng ni DSWD-CAR Regional Director Enrique Gascon, Jr, ti pannakaipasidung dagiti ubbing iti DSWD ket saan a mangipasimudaag nga mailaksiden dagitoy iti panagbalinda nga accountable kadagit inaramida.
Dagiti ubbing nga agtawen iti 15 agpababa a nangaramid iti seryoso a panaglabsing iti linteg ket kasapulan a dumalan iti mandatory intervention programs pakairamanan iti pannakaipasidungda iti Bahay Pag-asa (BPA).
Kabayatanna, dagiti met ubbing a naduktalan a nangaramid kadagiti krimen nga addaan iti discernment ket posible a sumango kadagiti kaso ken maipasidungda metlaeng iti pasilidad ti nasao nga ahensya bayat a pending pay laeng dagiti kaso dagitoy.
Inlawlawag ti nasao nga ahensya nga amin a CICL ket dumalan iti assessment sigun iti motibasyon, context,ken iti kondisyonda, saan laeng nga iti inaramid da a krimen.
Ti Bahay Pag-asa ket maysa a 24-hour institusyon a mangipapaay iti short-term residential care para kadagiti children in conflict with the law ,nga agtawen iti 15 agingga 18, bayat a maururay ti court disposition dagitoy.
Sigun iti Regional Juvenile Justice and Welfare Committee, adda ti lima a Bahay Pag-asa iti entiro a rehiyon.
Masarakan daytoy idiay Abra, Baguio City, Benguet, Kalinga ken Ifugao.
