Nangipaay iti tulong, alikamen, ken serbisyo dagiti kameng iti Department of Social Welfare and Development Field Office Cordillera Administrative Region (DSWD FO CAR) babaen iti Social Welfare and Development (SWAD) Office-Benguet para kadagiti residente iti probinsya.
Iti sidong iti Supplemental Feeding Program (SFP), naisayangkat ti ceremonial awarding para iti turnover kadagiti cooking utensils ken Information, Education, and Communication (IEC) materials kadagiti kameng iti local government units para iti lima a Day Care Centers tapno maituloy ti natalged ken nasustansya a panangipaay iti taraon kadagiti ubbing.
Tampok metlaeng iti programa ti ceremonial payout iti Sustainable Livelihood Program (SLP) no sadino tallo nga indibidual ti nakaawat ti tig-P20,000 kas tulong-kapital para iti panagrugi ken panagparang-ay kadagiti negosyoda.
Kabayatanna, babaen iti Assistance to Individuals in Crisis Situations (AICS), agarup 214 nga agad-adal ti naipaayan iti educational assistance bayat a 136 a residente ti naipaayan iti food assistance no sadino nakaawatda iti tig-₱5,000 a pinansyal a tulong.
Kasta met a naited ti maikadua a tranche iti UPLIFT cash assistance para iti 742 a benepisyaryo no sadino naipaay ti tig-P2,000 tapno makatulong kenkuada.
Iti pakabuklan, balligi iti program iti sidong iti Handog ng Pangulo 2026 no sadino agtultuloy ti panangipaay iti tulong iti DSWD FO CAR kadwa iti local goverment units tapno masigurado dagiti pinansyal a tulong, pagbiagan, ken nutrisyon ket direkta a maipaay kadagiti residente nga agkasapulan iti rehiyon.//Bombo Khey Reparip
