Nagpinnirma ti Department of Social Welfare and Development ken ti Philippine Ports Authority ti memorandum of agreement wenno katulagan a mangipaay kadagiti food pack para kadagiti stranded a pasahero tapno mapadaras ti pannakaited ti tulong nu dumteng ti didigra.
Iti sidong ti katulagan, mangipaay ti DSWD kadagiti kahon ti ready-to-eat food para kadagiti pasahero nga adda kadagiti terminal bayat ti panawen ti bagyo.
Sigun kenni Sec. Rex Gatchalian, saan a maliklikan dagiti didigra nu maminsan isut gapuna nga adda dagiti saan a matuloy a biahe, nga agserserbi a temporary shelter dagiti ports.
Ti kahon ket naglaon ti canned tuna paella ken dadduma a canned food, instant champorado, biscuits, ken taraon para kadagiti agpaspasuso nga inna.
Makikikoordinar metten ti DSWD babaen ti panangidaulo ni Gatchalian iti Department of Science and Technology tapno masigurado a nasustansia ti taraon a naikabil iti kahon.
Impasigurado pay ti nasao nga opisial a dagiti taraon ket inaramid dagiti Pilipino.
